Dear Attorney,
Isa po ang trabaho ko sa mga naapektuhan ng Enhanced Community Quarantine (ECQ) na ipinatutupad ng gobyerno. Dahil po rito ay wala akong sasahurin sa panahong sarado ang opisina namin at walang trabaho kaya wala akong maipambabayad sa nirerentahan ko ngayong apartment. Maari bang hindi ako magbayad ng aking renta para sa nakaraang buwan?
--Carlo
Dear Carlo,
Batay sa Memorandum Circular No. 20-12 na inilabas ng Department of Trade and Industry (DTI) noong April 4, 2020, kailangan pa ring bayaran ang mga residential at commercial rent kahit pa ang due date ng ng mga ito ay pasok sa panahon ng enhanced community quarantine (ECQ).
Gayunpaman, alinsunod sa Republic Act No. 11469 o Bayanihan to Heal as One Act, binibigyan ng nasabing circular ng tatlumpung (30) araw na palugit mula sa due date ang pagbabayad ng renta. Matapos nito ay maaring hulugan ang renta sa loob ng anim ba buwan matapos ang ibinigay na palugit.
Ipinagbabawal din ang pagpapataw ng interes, penalty, o anumang fees sa late na pagbabayad ng renta sa hinuhulugang renta na ito. Dagdag din ng circular na hindi maaring magpaalis ng hindi nakabayad na umuupa sa loob ng 30 araw matapos ang huling araw ng ECQ.
Kung nabayaran na naman ang renta ay hindi na maaring bawiin ito ng umuupa ngunit kailangang magbigay ang nagpapa-upa ng 30 araw na dagdag na palugit para sa kasunod na due date.