Lalaking ipinapasyal ang aso, naka-engkuwentro ang dambuhalang ibon na anim na talampakan ang taas!

ISANG lalaki sa Britain na ipinapasyal ang kanyang aso ang hindi inasahang makaka-engkuwentro niya ang isang ibon na anim na talampakan ang taas!.

Ayon sa 48-anyos na si Jason Burford, ipinapasyal niya ang border collie niyang si Molly, sa Forest of Dean sa Gloucestershire, England nang makasalubong nila ang ibon na isa palang Rhea, isang dambuhalang ibon mula South America.

Mabuti na lamang daw at kalmado si Molly dahil baka nagulat daw ang ibang aso at hindi pa naging maganda ang kinalabasan ng hindi nila inaasahang engkuwentro.

Itinawag na ni Burford ang nakita niya sa mga kinauukulan, na nagsabing malamang na nakawala ang dambuhalang ibon mula sa nagmamay-ari nito.