NAKUHA ng British swimmer na si Ross Edgley ang world record para sa pinakamatagal na paglangoy sa dagat noong Agosto 14. Tumagal ng 74 na araw ang kanyang paglangoy.
Sa buong panahon na iyon, anim na oras lamang ang pahinga ni Edgley kada araw. Bukod doon ay nakatuon na sa paglangoy ang kanyang buong araw.
Nahigitan niya ang world record na naitala ng Pranses na si Benoit Lecomte tatlong dekada na ang nakakaraan nang languyin nito ang karagatang Atlantiko sa loob ng 73 araw.
Ayon sa 32-anyos na swimmer, ginawa niya lamang daw ito bilang bahagi ng kanyang pangunahing layunin: ang malangoy ang palibot ng buong United Kingdom.
Sa tagal ng kanyang pamamalagi sa dagat, nasa 1,770 kilometro pa lang ng kabuuang 3,218 kilometro ang kanyang nalalangoy.
Bukod sa napakalaking distansya, malaking balakid din daw kay Edgley ang mga jellyfish at ang paglangoy kapag gabi.