MATAPOS ang kanyang pananatili sa loob ng isang bato ay laman na naman ng balita ang French artist na si Abraham Poincheval matapos nitong limliman ng tatlong linggo ang 10 itlog.
Tinaguriang “human hen” si Poincheval matapos magsilbing inahin sa 10 itlog na kanyang nilimliman gamit ang init ng kanyang katawan.
Sinimulan ni Poincheval ang kanyang pinakabagong proyekto noong katapusan ng Marso.
Sinigurado niyang maiinitan ang mga itlog sa pamamagitan ng pagtatalukbong sa isang kumot habang nakaupo sa isang lalagyan na kinaroroonan ng mga itlog.
Hindi naging madali ang pagiging “inahin” ni Poincheval dahil kinailangan niyang panatalihin sa paligid ng mga itlog ang mainit na temperatura na hindi dapat bababa sa 37 degrees Celsius.
Dahil dito, kinailangang upuan ni Poincheval ang mga itlog ng halos 24 oras. Mayroon lamang siyang kalahating oras kada-araw para makakain at makapagpahinga.
Matapos ang 23 araw, nagbunga naman ang lahat ng kanyang hirap dahil 9 sa 10 itlog ay napisa na.
Nangako naman si Poincheval na hindi magiging ulam ang mga sisiw na kanyang nilimliman kaya plano niyang paalagaan ang mga ito sa kanyang ama na mayroong bukirin sa kanlurang bahagi ng France.