Ang Ulan at Baha

Ulan nang ulan kung ilang araw na

Kung minsa’y malakas kung minsa’y mahina;

Ganitong panahon sabi ng PAGASA

Ay dulot ng bagyong pumasok sa bansa!

Ganito sa bansa kapag dumarating

Panahong tag-ulan sa baya’t bukirin;

Sa panahong ito -- itong bansa natin

Sagana sa tubig na sa langit galing!

At sapagka’t langit ang s’yang nagtatakda

Kung kailan hihinto ang ulan sa bansa;

Kaya ang langit din ang siyang bahala

Kung paarawin o kaya’y babaha!