Mabibihira mo sa panahong ito
Mga mamamayang may ugaling santo;
Kahit saang pook kahit saang dako
Sanggano at maton ang naggala rito
Sa mga lansanga’y iyong makikita
Kabataan nating ngayo’y nagbago na;
Sa halip na libro ang kanilang dala
Ay bote ng alak, baril at lanseta
Mga kabataang inasam ni Rizal
Na sa bayan natin ay magsasanggalang
Ay siya pa ngayong puno at dahilan
Ng pataya’t riot, mga kaguluhan
Ang kababaihang dapat ay simbolo
Ng magandang kilos at damdaming santo
Di pa man dalaga’y mayro’n ng querido
At pati ang sumpa’y bigay-bawing “Oo”