Magbago pa kaya ugali ng Pinoy
Na di alintana ang buhay sa ngayon?
Mga kabataan ay naglilimayon
At sa pag-aaral ay walang direks’yon?
Masdan mo sa ngayon itong mga bata
Di na gumagalang sa mga matanda;
Sa maraming dako ay pagala-gala
Sa mga lansangan ay nakatunganga!
Ang ugaling ito nitong kabataan
Ay namana nila sa mga magulang;
Ang ama at ina lagi sa sugalan
Kaya mga anak napapabayaan!
Dapat ang magulang ay maging modelo
Nitong kabataang ngayo’y nalilito;
Sa isang tahanan ang ugaling wasto
Ituro sa anak habang bata ito!