MANILA, Philippines — Tinatayang nasa P86-milyong halaga ng mga hinihinalang smuggled na asukal na laman ng 30 containers ang nasabat ng mga tauhan ng Bureau of Customs (BOC) sa Port of Subic.
Sa ulat, unang nakatanggap ang BOC Intelligence Group (IG) ng ‘deregatory report’ ukol sa 30 5x20 containers mula sa Hong Kong na nakadeklarang naglalaman ng ‘slipper outsoles at styrene butadiene rubber’ ngunit pinaghihinalaan na asukal ang laman.
Nang buksan ang mga container nitong Marso 15, tumambad ang nasa 15,648 sako ng refined sugar.
Agad na naglabas ng Warrant of Seizure and Detention sa naturang mga iligal na produkto si District Collector Maritess Martin.
Sinabi ni BOC Commissioner Bienvenido Rubio na kailangan ng patuloy na ugnayan ng iba’t ibang ahensya upang epektibong malabanan ang aktibidad ng mga smugglers lalo na sa agricultural smuggling.