DSWD chief, ‘di magtatanggal ng mga tauhan
MANILA, Philippines — Inihayag kahapon ni Department of Social Welfare and Development (DSWD) Secretary Rex Gatchalian na wala siyang tatanggalin na mga tauhan bagkus ay magdaragdag pa siya.
“Magagaling ang mga taga-DSWD, wala tayong aalisin sa kanila at magdadagdag pa tayo ng mga dagdag na talents at social science at logistic experts , para mapabuti pa ang serbisyo ng DSWD. Ang gusto ko kahit may bagong administrasyon ay walang mapuputol na serbisyo. Titiyakin natin na ang kagutuman ay ating mareresolbahan at mapipigilan ang kahirapan,” wika ni Gatchalian.
Aniya, kukunin nila ang tulong ng mga academe, tulong ng PSA at ng mga experts para malaman kung ano ang mga tama at ang mga bagay na dapat pang palakasin sa pagseserbisyo ng DSWD sa mga tao bukod sa pagpapalakas sa disaster response at residential care facility.
Sinabi ni Gatchalian na kung may ease of doing business sa LGUs ay may Ease of Doing Social Welfare sa DSWD para mabilis ang serbisyo sa tao.
Iniulat din nito na pagkakalooban ng livelihood programs ang mga sinalanta ng lindol sa Davao de Oro.
- Latest
