MANILA, Philippines — Kapwa idineklarang dead-on-arrival sa ospital ang isang barangay captain at misis nito matapos na pagbabarilin ng mga hindi pa nakikilalang suspek sa naganap na ambush, kamakalawa ng hapon sa Parang, Maguindanao Del Norte.
Kinilala ang mga nasawi na sina Pollo Brgy. Chairman Abubacar Abdul at misis nito na si Baisa Abdul.
Sa pagsisiyasat ng Parang Municipal Police Station, alas-5:30 ng hapon ng maganap ang ambush sa Narciso Ramos Highway ng Sitio Timbangan, Brgy. Sarmiento, ng nasabing bayan.
Nabatid na sakay ang mag-asawa ng isang kulay puting Toyota pickup (DAQ 4412) na minamaneho ni Abubacar nang biglang harangin at pagbabarilin ng mga kalalakihang armado ng kalibre 45 pistola.
Nagtamo ng mga tama ng bala ng baril sa katawan ang mag-asawa habang ligtas naman ang barangay secretary.
Mabilis namang tumakas ang mga salarin sakay ng motorsiklo nang matunugan nila na nagresponde ang mga sundalo at pulis.