Napoles, ex-solon tablado sa Sandiganbayan
MANILA, Philippines — Tinanggihan ng Sandiganbayan ang mosyon ng dating negosyanteng si Janet Lim Napoles at ex-Masbate Third District Rep. Rizalina Seachon-Lanete na mabasura ang kinakaharap nilang P108.4M plunder at graft kaugnay ng Priority Development Assistance Fund (PDAF) scam.
Sa magkakahiwalay na resolusyon na may petsang Nov. 25 at Nov. 21, 2022, ibinasura ng Fourth Division ang motions for leave to file demurrer to evidence nina Napoles at Seachon-Lanete.
Ang demurrer to evidence ay isang paraan para madismis ang kaso kung nabigo ang prosekusyon na magsumite ng supisyenteng ebidensiya.
Ayon sa anti-graft court, ang testimonial at documentary evidence ng prosekusyon ay supisyente para maigawad ang guilty verdict sa mga akusado maliban kung matagumpay itong makokontra.
Sina Napoles at Lanete ay nahaharap sa kasong graft at pandarambong matapos umanong ibulsa ang higit P108 milyong kickback sa PDAF scam mula 2007 hanggang 2010.
- Latest