MANILA, Philippines — “Tuluyan ng ipagbawal sa bansa ang pagbebenta, distribusyon at paggamit ng anumang firecrackers at pyrotechnics devices.”
Ito ang isinusulong ni House Committee on Local Government Chairman at Valenzuela City Rep. Rex Gatchalian upang maiwasan ang disgrasya lalo na sa pagsalubong ng Bagong Taon.
Si Gatchalian ay naghain ng House Bill (HB) 5914 o ang Firecrackers Prohibition Act upang ipatupad ang ‘total ban’ laban sa mga paputok nang maiwasan ang mga ‘related firecrackers injuries.’
Ayon sa mambabatas sa tuwing sasapit ang pagsalubong sa Bagong Taon ay maraming mga nadidisgrasya kabilang ang mga bata na kung saan kung mamalasin pa ay napuputulan ng mga daliri, kamay at iba pa kapag nasasabugan ng malalakas na uri ng paputok.
Tinukoy ng solon na ang mga bata at mga kabataan o mga ‘young adults’ na nagkakaedad 11-anyos at maging ang 30-anyos ang karaniwang nabibiktima ng mga ipinagbabawal na paputok tulad ng boga, 5 star, piccolo, super bawang , super lolo at iba pa.
Base sa datos ng Department of Health (DOH), naging epektibo ang kanilang kampanya kontra sa pagpapaputok pero nabawasan lamang ang nadidisgraya.