COVID-19 surge sa mga iskul tinututukan ng DepEd
MANILA, Philippines — Ilang eskuwelahan sa bansa ang kinumpirma ng Department of Education (DepEd) na nagkaroon ng hawaan ng COVID sa gitna ng pagpapatuloy ng face-to-face classes.
“In a gathering of people, especially of learners and teachers in classrooms, expected naman po talaga na may mag-positive,” ang wika ni DepEd spokesperson Michael Poa.
“Hindi po ‘yan naiiba sa mga office situations. Gusto po natin iwasan talaga and that’s why we’re closely monitoring is ‘yung pagkakaroon ng surge,” dagdag na pahayag nito.
Tiniyak rin ni Poa na gumagawa sila ng mga pamamaraan at istriktong ipinaiiral ang mga health protocols sa mga paaralan upang maiwasan ang mga ganitong pangyayari.
Batay sa DepEd Order No. 34, ang sinumang estudyante na makikitaan ng mga sintomas ng COVID-19 ay kaagad na pauuwiin at lilipat sa distance o modular learning.
Wala pa namang inilalabas na karagdagang detalye ang DepEd hinggil dito at hindi pa rin batid kung ilang guro at estudyante ang nagka-COVID-19 at kung saang paaralan naitala ang mga naturang kaso.
Matatandaang ipinag-utos na ng DepEd ang pagdaraos ng limang araw na face-to-face classes sa lahat ng paaralan sa bansa, pribado man o pampubliko, simula sa Nobyembre 2, 2022.
- Latest
