MANILA, Philippines — Nahadlangan at kinumpiska ng mga tauhan ng Bureau of Customs (BOC) ang illegal na pagpasok sa bansa ng nasa P6 milyon halaga ng puting sibuyas.
Nabatid na ang naturang kontrabando ay naka-consigned sa Silverpop Dry Goods Trading at nakumpiska sa International Container Port (MICP) noong Hunyo 28 lamang.
Ayon naman kay Customs Deputy Commissioner for Intelligence Raniel Ramiro, naalerto ang kanilang tanggapan matapos na makatanggap ng “derogatory information” na ang mga shipments mula sa naturang consignee ay naglalaman ng mga agricultural products at misdeclared at undeclared items.
Tiniyak naman ng Customs examiners at ng iba pang kinatawan ang 100% eksaminasyon ng shipment ng tatlong 40-foot containers na natuklasang naglalaman ng mga sariwang puting sibuyas, sa kabila nang ito ay idineklarang naglalaman ng mga steamed buns mula sa China.
Matapos matukoy ang presensiya ng mga smuggled agricultural products, kaagad na humiling ang Customs Intelligence and Investigation Service (CIIS) sa MICP para sa agarang paglalabas ng Alert order/Pre-Lodgement Control Orders (PLCOs). Inaasahang kaagad ring sasampahan ng smuggling cases at iba pang kaukulang legal cases ang isasampa laban sa consignee dahil sa paglabag sa importation laws and regulations.