MANILA, Philippines — Upang mapigilan ang pagkalat pa ng COVID-19 sa Metro Manila, partikular na ng Delta variant ay nais ni Department Interior and Local Government (DILG) Secretary Eduardo Año na magkaroon ng 24/7 vaccination.
Ayon kay Año, mag-o-overtime ang mga local government units (LGUs) at magtatakda ng evening schedules para sa pagbabakuna upang mapabilis pa ang proseso nito.
“Ito ay isa sa pinakamagandang paraan para mapabagal at ma-address ang transmission,” dagdag pa ng kalihim.
Sinabi ni Año na target nilang makapag-administer ng apat na milyong doses ng COVID-19 vaccine sa Metro Manila, na nakatakdang isailalim sa enhanced community quarantine (ECQ) mula Agosto 6 hanggang 20. - Ludy Bermudo