PNP chief: Hindi aarestuhin ang ayaw magpabakuna!
MANILA, Philippines — Tiniyak ni Philippine National Police (PNP) Chief General Guillermo Eleazar na hindi aarestuhin ng mga pulis ang mga taong ayaw magpabakuna sa kabila ng babala ni Pangulong Rodrigo Duterte na aarestuhin na ang sinumang hindi magpapabakuna laban sa CoViD-19 virus.
Ayon kay Eleazar, nakipag-ugnayan na siya kay Justice Secretary Menardo Guevarra kung saan sinabi ng kalihim na walang batas na gagamiting batayan sa pag-aresto sa mga ayaw magpabakuna.
Gayunman, naniniwala si Eleazar na hindi na kailangang pilitin ang mga ayaw magpabakuna dahil marami na ang kumbinsido na makakatulong ang bakuna na panlaban sa CoViD-19 dahil kitang-kita umano ito sa haba ng pila sa halos lahat ng mga vaccination sites.
Kung mayroon mang nag-aalinlangan pa sa ngayon ay kailangan lang aniya silang kumbinsihin sa pamamagitan ng mas masugid pang information campaign.
- Latest