120K sa NCR Plus target na bakunahan kada araw
MANILA, Philippines — Nasa 120,000 katao kada araw sa National Capital Region (NCR) Plus bubble ang target na mabukanahan ng gobyerno upang tuluyang mapigilan ang pagkalat ng virus at magkaroon ng “herd immunity” sa itinuturing na virus epicenter na Metro Manila, ayon kay Vaccine Czar Secretary Carlito Galvez Jr.
Sinabi rin ni Galvez na target ngayong Mayo na magkaroon ng 2-milyong vaccination bukod pa ang sa Hunyo at apat na milyon sa Hulyo.
“Sa NCR, ang target po natin, nagkaroon kami ng simulation, 120,000 a day. Ang ating inaakyat ngayong May ay magkaroon tayo ng 2M na vaccination and also at least this coming June, magkaroon tayo ng 4M ang ating ma-vaccinate and July onwards magkakaroon na tayo ng tinatawag na 1M-2M per week na ang ating target,” ani Galvez.
Inuuna aniya ang NCR Plus, Metro Davao at Metro Cebu na itinuturing na mga “centers of gravity.”
Idinagdag ni Galvez na target nilang matapos ang pagbabakuna sa Metro Manila sa Nobyembre 27.
Inaasahan ang pagdating ng nasa 7-milyong doses ng bakuna ngayong Mayo kung saan 2.2 milyon ay magmumula sa Pfizer sa pamamagitan ng Covax facility. Mayroon ding 1.3 milyon doses ng bakuna mula sa Russia na Sputnik V ang inaasahang darating sa bansa bukod pa sa 500,000 doses mg Sinovac na darating sa Mayo 22.
- Latest
