CEBU, Philippines — Umabot sa mahigit kalahating milyon ang naaresto ng Philippine National Police (PNP) na mga lumabag sa mga umiiral na minimum public health standards mula Marso hanggang Mayo 7 ng taong ito.
Sa record ng PNP. nasa 566,177 ang nahuli dahil sa iba’t ibang mga paglabag na kinabibilangan ng 219,778 sa hindi pagsusuot ng face shield; 226,904 naman ang hinuli dahil sa hindi pagsusuot ng facemask; 115,999 ang mga nahuli sa paglabag sa physical distancing at 3,496 ang nahuling nagsasagawa ng mass gathering.
Ang pag-aresto sa mga health protocols violators ay bunsod na rin sa pag-iingat na ipinatutupad ng pamahalaan upang maiwasan na mahawa at kumalat ang virus ng CoViD-19.
Ayon kay PNP chief Gen. Guillermo Eleazar, patuloy ang pag-aresto sa mga lalabag, idodokumento at agad ding pauuwiin, subalit kung paulit-ulit na maaaresto ang isang violator ay posibleng sampahan na ito ng kaso sa korte.