MANILA, Philippines — Nasa P150,000 ang matatanggap ng pamilya ng mga pulis na masasawi habang tumutupad ng tungkulin o yung tinatawag na “killed in action”.
Ito ang nabatid kay PNP Chief PGen. Debold Sinas matapos ang isinagawang pirmahan ng Memorandum of Understanding ng PNP at Cosmopolitan General Pre-Need Agency, Inc. (CGPAI) at Cosmopolitan Climbs Life Plan Incorporated (CCLPI).
Ayon kay Sinas, layon ng kasunduan na mabigyan ng kasiguraduhan ang bawat pamilyang maiiwan nang mga pulis sa pagpapatupad ng kanilang tungkulin.
Ani Sinas, mahirap sa pamilya ng mga namatay na pulis na mawalan ng mahal sa buhay subalit mas mahirap na walang pantustos sa pagpapalibing.
Dagdag pa ni Sinas, nais lamang nilang mabigyan ng maayos na libing ang sinumang pulis na masasawi habang tumutupad ng kanilang tungkulin.
Tiniyak pa ni Gen. Sinas ang agarang pag-release ng burial assistance sa mga iniwan ng mga bayaning pulis upang makabawas sa kanilang alalahanin sa panahon ng kanilang pagdadalamhati.