Pilipinas, no. 3 sa vaccination rollout sa ASEAN countries
MANILA, Philippines — Ibinalita ng Department of Health (DOH) na pumapangatlo ang Pilipinas sa ASEAN countries pagdating sa vaccination rollout ng COVID-19.
Sinabi Dr. Myrna Cabotaje, head ng vaccine cluster ng ahensya na umabot na sa 1,456,793 ang nabakunahan ng Sinovac at AstraZeneca.
Kasunod lamang ng Pilipinas sa ikaapat na puwesto ang Myanmar na may 1,040,000 doses at ikalima ang Malaysia na may 1,018,937 doses.
Aniya, may problema sa suplay pero may dumating naman kaya nakapagbakuna ng maraming indibidwal.
Sa mga doses na naibigay, 960,191 healthcare workers ang nakatanggap ng unang dose habang 191,982 ang nakakumpleto na ng dalawang doses; nasa 128,018 senior citizens ang nabigyan ng unang doses at wala pang ikalawang dose; habang 176,305 indibidwal na may comorbidities ang nabigyan na rin ng unang dose ng bakuna.
Kabilang sa mga bakunang gamit sa Pilipinas ay ang isang milyong doses ng Sinovac na donasyon mula sa COVAX facility at 525,600 doses ng AstraZeneca buhat din sa COVAX at 1.5 milyong doses ng Sinovac na bahagi ng binili mismo ng pamahalaan.
- Latest