MMDA sa manggagawa: Sapat na ang ipinakitang ID kapag naabutan ng curfew

MANILA, Philippines — Walang magiging problema ang mga manggagawa na maabutan ng curfew hour sa daan.

Ito ang inihayag ni Presidential spokesperson Harry Roque sa virtual meeting na kung saan ay sinabi ni MMDA chair Benhur Abalos na maski ID na lamang ng isang manggagawa ang ipakita sa mga barangay officials o sa pulis na magbabantay sa kalsada o daanan ay puwede na at hindi na sila kukuwestiyunin pa.

“Maski ID na lang po ang ipakita noh? kamukha po ng dati noong ECQ. Maski ID lang, puwede na po,” ani Abalos.

Sinabi pa niya na hindi na kailangan na magpakita pa ng Certificate of Employment (CoE).

Nagsimula na ang curfew hour sa Metro Manila na magsisimula alas-8:00 na ng gabi hanggang alas-5:00 ng umaga.