MANILA, Philippines — Dalawang notoryus na drug pusher ang nalambat ng mga otoridad sa isang buy-bust operation at nakumpiska ang nasa P108 milyong halaga ng hinihinalang shabu na nakalagay sa Chinese tea pack, kamakalawa ng gabi sa Makati City.
Kinilala ang mga nadakip na sina Kemin Manisi, alyas Taba, 49-anyos, driver; at si Abdulrahim Ysmael, alyas Indeg, 28-anyos at kapwa nakatira sa Brgy. Maharlika, Cagayan De Oro.
Sa ulat, dakong alas-9:40 ng Lunes ng gabi nang magkasa ng anti-drug operations ang mga otoridad sa may Kalayaan Avenue, Brgy. West Rembo.
Matagumpay na nakabili ng shabu na nakalagay sa Chinese tea pack na may halagang P1 milyon ang poseur buyer sa dalawang suspek na agad na dinakma ng mga nakaantabay na mga operatiba nang magbigay ng hudyat.
Umabot sa 155 block plastic pack ng Chinese tea na naglalaman ng tinatayang 16 na kilo ng shabu at may halagang P108 milyon ang nasabat sa dalawang suspek.