Bilang ng mga taong gustong magpabakuna, dumarami na
MANILA, Philippines — Unti-unti nang dumarami ang bilang ng mga taong nais at handa nang magpaturok ng bakuna laban sa coronavirus disease 2019 (COVID-19).
Ito ang kinumpirma ng Department of the Interior and Local Government (DILG),batay na rin sa resulta ng entry at exit polls ng mga serye ng webinars na isinagawa ng kanilang ahensiya, katuwang ang Department of Health (DOH).
Sinabi ni DILG Spokesperson at Undersecretary Jonathan Malaya na sa lahat ng limang town hall sessions na isinagawa ng DILG at DOH, mayroong dumaraming trend ng mga kalahok na pumapayag nang magpabakuna matapos na dumalo sa COVID-19 vaccine town hall sessions.
Tinukoy pa ni Malaya ang pagiging epektibo ng town hall sessions kung saan ang comparative data ng entry at exit polls ay nakalap.
Sa isinagawa umanong unang DILG webinar sa Luzon Cluster ng Bureau of Fire Protection (BFP) at Bureau of Jail Management and Penology (BJMP), natuklasan ng pollsters na ang bilang ng mga nais na magpabakuna ay lumaki ng mula 67% hanggang 83% matapos ang webinar.
Ang mga nagsabing ayaw namang magpabakuna ay bumaba ng mula 8% ay naging 4% na lamang, habang ang mga undecided ay bumaba rin ng mula 26% hanggang 12%.
Hinikayat rin ni Malaya ang lahat ng LGUs na magsagawa ng sariling town hall sessions at community engagement activities sa kani-kanilang LGUs upang makahikayat ng mga mamamayan na magpabakuna.
Umaasa naman si Malaya na ang serye ng DILG-DOH town hall webinars ay lilikha ng ‘ripple of effects’ sa kabuuang populasyon ng mga Pinoy.
- Latest
