MANILA, Philippines — Dahil sa pagmamaltrato sa kanyang Filipino domestic helper na kasama sa Brazil ay inaprubahan ni Pangulong Rodrigo Duterte ang pagsipa sa serbisyo ng dating ambassador ng Brazil na si Marichu Mauro.
“Sorry, iyong ambassador doon sa Brazil who maltreated a household helper, ito repeatedly inflicted physical harm doon sa tao. The recommendation was --- and I am --- I signed the... When was it? The other day or last night? I signed the document affirming the decision,” ani Duterte.
Bukod sa dismissal sa serbisyo, hindi na rin makukuha ni Mauro ang kanyang retirement benefits at hindi na muling papayagang makapagtrabaho sa gobyerno.
Matatandaan na nakunan ng video ang pagmamaltato ni Mauro sa kanyang 51 taong gulang na kasambahay sa loob ng diplomatic residence sa Brazil.
Samantala, sinabi ni Foreign Affairs Secretary Teodoro Locsin Jr., na ipinagbabawal na ang pagdadala ng mga domestic staff ng mga diplomatic officers sa ibang bansa matapos ang ginawang pagmaltrato ni Mauro.
Sinabi rin nito na ang mga nais magkaroon ng domestic staff ay kailangang dumaan sa Philippine Overseas Employment Administration (POEA).
Nagtakda rin ng minimum na sahod na $400 hanggang $600 na idedeposito sa account ng domestic staff.