MANILA, Philippines — Iminungkahi kahapon ng isang kongresista na gumamit ng iba’t ibang wika sa mga rehiyon sa bansa sa information drive sa COVID-19 vaccine kaugnay ng ikinakasang vaccination program ng pamahalaan.
Ayon kay 2nd District Misamis Oriental Rep. Juliette Uy, ito ay sa gitna na rin ng agam-agam ng mga Pinoy kung magpapaturok ba sila ng bakuna o huwag muna.
“Mother tongues or regional languages is crucial in convincing Pinoys to agree to COVID-19 vaccines. Mas dadami ang gustong magpabakuna at mapapabilis ang pagbabakuna kapag ipinaliwanag ang siyensiya nito hindi lamang sa Ingles at Filipino,” pahayag ni Uy.
Sinabi ni Uy na dapat din sa wikang Cebuano, Maguindanao, Hiligaynon, Kiray-a, Waray, Bicol, Kapampangan, Ilocano, at iba pang mga wika sa Pilipinas isagawa ng gobyerno ang information drive sa COVID-19 vaccine.
“I have seen the tagalized infographics of the DOH. Those are good initial efforts, but much more needs to be done,” punto pa ng lady solon.
Una rito, hinikayat ng ilang mambabatas na pangunahan ni Pangulong Rodrigo Duterte ang pagpapaturok ng COVID-19 vaccine upang lumakas ang kumpiyansa ng mamamayan sa mga darating na delivery ng bakuna laban sa virus sa bansa.