MANILA, Philippines — Namatay noon din ang magpinsan na magsasaka matapos na sila ay pagbabarilin ng kapitbahay na isa ring magsasaka na kanilang kinukutya naganap kamakalawa sa Sitio Ilaya Barangay Bani, San Narciso, Quezon.
Ang magpinsan na nasawi dahil sa mga tama ng bala sa ulo at katawan ay nakilalang sina Luis, 45 at Eduardo Aborde, 34.
Naaresto naman ang suspek sa isang follow-up operation na nakilalang si Marlon Agad, 40, may asawa ng nasabi ring lugar.
Sa imbestigasyon, bago naganap ang krimen, alas- 7:30 ng gabi ay nag-iinuman ang suspek at si Luis na nauwi sa mainitang pagtatalo matapos kutyain ng huli ang una na walang sariling lupa na sinasaka.
Napikon ang suspek hanggang sa bumunot ng baril at makailang beses na pinaputukan ang biktima na agad niyang ikinamatay.
Tinangkang umawat ni Eduardo, subalit tinamaan ito sa ulo ng ligaw na bala na ikinamatay din nito.
Nahaharap sa kasong double murder ang suspek na nakapiit ngayon sa municipal jail.