Price cap sa COVID-19 swab test epektibo na — DOH
MANILA, Philippines — Binalaan ng Department of Health (DOH) ang mga pribadong laboratoryo na may nakalaang parusa na sa manininingil ng sobrang mahal sa swab test.
Ito ang inihayag ni Health Secretary Francisco Duque III makaraang maging epektibo na ang price cap sa COVID-19 RT-PCR test.
Itinakda sa P3,800 ang RT-PCR tests sa mga ospital ng pamahalaan habang P4,500 hangggang P5,000 naman sa mga pribadong pagamutan at laboratoryo.
Ang mga lalabag sa joint administrative order ng DOH at Department of Trade and Industry (DTI) ay may katumbas na mga parusa at multa.
Sa unang paglabag, masususpinde ang license to operate ng pasilidad ng hanggang 15-araw at multa na P20,000; sa ikalawang paglabag ay 30-araw na suspensyon at P30,000 multa at sa ikatlong paglabag ay pagbasura na sa lisensya ng pasilidad.
Itinakda ang price cap makaraan ang napakaraming reklamo sa publiko sa paniningil ng mga pagamutan at laboratoryo ng hanggang P10,000 sa RT-PCR test.
Nilinaw ni Duque na sa naturang price range, kasama na rito ang iba pang gastos na kaakibat ng pagpapa-test tulad ng mabilis na paglabas ng resulta.
Nakatakda naman na magpalabas din ang DOH at DTI ng price cap sa antigen test sa oras na matapos na ang kanilang pag-aaral sa merkado ukol dito.
- Latest