DOLE tinukoy ang matatag na trabaho sa Metro Manila

MANILA, Philippines — Tinukoy ng Department of Labor and Employment (DOLE) ang ilang “resilient” o matatag na trabaho sa Metro Manila na tumagal sa epekto ng COVID-19 pandemic kung saan marami ang nawalan ng trabaho.

Sinabi ni Labor Secretary Silvestre Bello III, ang online post ng mga trabaho para sa mga manggagawa na may kasanayan sa health care, logistics, information technology, business process management, education, at construction ay tumataas.

Sa ilalim ng Health Care and Wellness sector, kailangan ng maraming medical doctors, nurses, medical at radiologic technologists, pharmacists, psychologists, medical researchers at writers, gayundin ang wellness trainers­ at representatives.

May higit sa 10,000 oportunidad naman sa sektor ng business process outsourcing (BPO) sa bansa tulad ng customer­ care representatives, technical support staff, frontline/specialists, supervisors, trainers, managers at iba pang uri ng trabaho sa finance, information technology at marketing.

Sa logistics sector na nangailangan ng maraming tauhan ngayong panahon ng lockdown sa rami ng gumagamit ng delivery applications para sa pagkain at ibang pangangailangan sa bahay.

Tumaas din ang panga­ngailangan sa mga cons­truction workers lalo na sa mga heavy equipment ope­rators at safety engineers dahil sa patuloy na pag­larga ng mga malalaking proyekto ng pamahalaan sa ilalim ng “Build, Build, Build program”.