MANILA, Philippines — Namatay noon din ang isang hindi pa nakikilalang lalaki makaraang pagbabarilin ng hindi pa rin natutukoy na salarin sa Port Area, Maynila kahapon ng umaga.
Patuloy na inaalam ang pagkakakilanlan ng nasawi na inilarawan na nakasuot ng puting t-shirt at itim na shorts at tinatayang nasa pagitan ng edad na 30 hanggang 40 taong gulang.
Sa inisyal na ulat ng pulisya, dakong alas-10:00 ng umaga nang barilin ang biktima habang ito ay nakaupo sa kanto ng Railroad at 12th St., Port Area, Manila.
Rumesponde ang mga tauhan ng istasyon at inabutan ang biktima na naliligo sa sariling dugo dahil sa tama ng bala sa katawan at wala nang buhay.