MANILA, Philippines — Nabunyag sa isinagawang pagdinig ng Senate committee on finance and economic affairs ni Senator Sonny Angara na tinatayang 865,000 na mga manggagawa mula sa audio visual industry ang naapektuhan sa trabaho dulot ng COVID-19.
Sinabi ni Liza Diño, chairperson ng Film Development Council, apektado ang nasabing bilang ng mga manggagawa na kung saan maaaring sila ang pinakahuling maibalik sa trabaho o operasyon ng negosyo dahilan sa mass gatherings
Paliwanag pa ni Diño, 70 porsiyento ng mga workers sa industry ay freelancers na walang trabaho sa kasalukuyan at nag-allot na rin ng P20 milyon ng pondo para mabigyan ng P5,000 hanggang P8,000 emergency subsidies ang mga apektadong manggagawa sa industriya.
“Ang laki po ang audiovisual industry and ‘yun nga po dahil hindi kami nahahagip ng census studies ng PSA statistics, minsan po ay nakakalimutan ‘yung aming pinagdadaanan at kalagayan ng mga nasa industriyang ito,” pahayag pa ni Diño.
Kabilang sa audio visual industry ay mga manggagawa sa film, animation, TV, commercials, live events, at manufacturing of audiovisual equipment.