MANILA, Philippines — Dead-on-the-spot ang isang 29-anyos na babaeng gasoline attendant na si Bernadeth Mamangon, may-asawa, makaraang barilin sa ulo ng isa sa dalawang holdaper nang tumangging ibigay ang sling bag na naglalaman ng kinitang pera ng kanilang gasolinahan, kamakalawa sa Purok 4, Felipe Vergara Road, Barangay Talipapa, Cabanatuan City, Nueva Ecija.
Sa ulat, bandang alas-9:30 ng gabi noong Sabado, abala umano sa pagkakarga ng gas ang biktima sa motor ng dalawang suspek na nagpanggap na kostumer nang magdeklara ng holdap at pilit na kinukuha ang nakasukbit na sling bag.
Hindi umano pumayag ang biktima hanggang sa isa pang suspek ang nagpunta sa kanyang likuran at doon ay binaril ito sa ulo.
Pagbagsak ng biktima ay dito na kinuha ng dalawang suspek ang sling bag ng biktima na sinasabing naglalaman ng P2,500 cash na bahagi ng kinita ng nasabing gas station ng araw na iyon.
Nirerebyu ng pulisya ang kuha sa CCTV ng nasabing gas station upang matukoy ang dalawang salarin.