Iwasan munang bumiyahe sa South Korea!
DOH sa mga Pinoy...
MANILA, Philippines — “Iwasan munang magtungo o magbiyahe sa South Korea lalo na sa mga lugar na labis na apektado ng sakit na COVID-19”.
Ito ang ipinayo ni Health Secretary Francisco Duque III habang hindi pa napagdedesisyunan ng Department of Labor and Employment (DOLE) kung magpapatupad ng travel ban sa South Korea dahil sa patuloy na pagdami ng nasabing sakit.
Partikular na tinukoy ni Duque III, na iwasan muna ang magtungo sa Daegu City at sa Cheongdo na may mataas na bilang ng kaso ng COVID-19.
Pinayuhan din ang mga Pinoy na masusing bantayan ang sitwasyon sa South Korea bago magpasiyang bumiyahe.
Sa kasalukuyan ay mayroon nang 893 na kaso ng COVID-19 sa South Korea matapos makapagtala ng panibagong 60 kaso sa nakalipas na magdamag.
Muling nanawagan si Duque sa publiko na huwag nang gumamit ng face mask kung wala namang sakit.
Ang mas mahalaga aniya ay palakasin ang immune system at pananatili ng kalinisan sa katawan.
“Basta maghugas ka na lang ng kamay mo ng 20 seconds. Mas madalas, mas maigi. O kaya magpunas ng alcohol. Magbaon ng panyo, panangga sa pagsinga, bahing at ubo para ‘di makahawa.
At kung meron ka namang sakit, manatili ka na lang sa tahanan mo at mag-mask ka,” wika ni Duque.
- Latest
