Pagtatayo ng MRT-7 sa QC Circle pinahinto ni Mayor Joy B

MANILA, Philippines — Pinahinto muna ni Quezon City Mayor Joy Belmonte ang ground construction ng MRT-7 Quezon Memorial Circle (QMC) station upang matiyak sa developer na contractor at sa Department of Transportation (DOTr) na hindi maaapektuhan ang integridad ng pamosong landmark at heritage site ng lunsod. 

Sinabi ni Belmonte na siya ay sumusuporta sa ‘build build build’ program ng pamahalaan pero hindi nito dapat maaapektuhan at masisira ang kilalang heritage site laluna ang surface ng naturang parke

Inutos ni Belmonte ang pagbusisi sa proyekto dahil sa nakarating na impormasyon sa kanya na ang proyekto ay lumampas sa napagkasunduang lugar na pagtatayuan ng MRT7.

Sa naibigay na permit at clearance sa proyekto, inilagay ng contractor na ang proyekto na may 4,997 square meters ang floor area nito pero lumalabas na ang proposed floor area ay mas malaki ng limang beses kaysa sa naaprubahang laki.

Dahil ang QMC ay isang historical landmark,  nais ni Belmonte na magbigay ng pahayag hinggil dito ang National Historical Commission of the Philippines (NHCP), National Commission for Culture and Arts (NCCA) at ang Quezon-Avancena Family, ang mga tagapagmana ni dating  Pangulong Manuel L. Quezon.

Ang labi ni Quezon ay matatagpuan sa QC Circle.