MANILA, Philippines — Nakatakdang ipatupad ng bagong hirang na si Philippine National Police (PNP) Chief Police Gen. Archie Gamboa ang malawakang balasahan sa hanay ng mga opisyal ng organisasyon pagkaraan ng tatlong buwang ebalwasyon sa performance ng mga ito na pormal na nagtapos kahapon kung saan ngayong araw ay pag-aaralan ang rekomendasyon at pormal na iaanunsyo sa susunod na araw ang panibagong rigodon.
Si Gamboa ay pormal nang nanungkulan kahapon bilang ika-23 PNP Chief matapos ang donning of ranks at panunumpa nito sa tungkulin na produkto ng Philippine Military Academy (PMA) Sinagtala Class 1986.
Nahirang ito ni Pangulong Rodrigo Duterte matapos ang tatlong buwang panunungkulan bilang Officer-in-Charge (OIC) ng PNP matapos namang mag-avail ng Non Duty Status si dating PNP Chief ret. Police Gen Oscar Albayade noong Oktubre 14, 2019 dahilan sa isyu ng ninja cops.