MANILA, Philippines — Namatay noon din ang isang barangay chairman na dating vice mayor sa bayan ng Pandi at isang barangay chairman matapos na sila ay pagbabarilin ng dalawang lalaki kahapon ng tanghali sa Brgy. Bulihan, Plaridel, Bulacan.
Ang dalawang biktima na namatay noon din ay kinilalang sina dating Pandi, Bulacan Vice Mayor Oscar Marquez, 54, ng Brgy. Manatal at Mauro Capistrano, 56, chairman ng Brgy. Bagbaguin, Pandi, Bulacan.
Sa salaysay ng isang saksi, alas-12:50 ng tanghali ay sakay ang dalawang biktima ng isang puting Toyota Fortuner (NBU-7644) nang bumaba ang mga ito para kumain sa Celo Eatery.
Makalipas ang halos isang oras ay may dumating na dalawang lalaki sakay ng isang kulay itim na Honda Click motorcycle na biglang pumasok sa nasabing eatery ang isang suspek at pinagbabaril si Capistrano sa ulo na agad niyang ikinamatay.
Nagtatakbo naman si Marquez,subalit hinabol siya ng dalawang suspek at nang maabutan ay pinagbabaril din ito hanggang sa mamamatay.
Nang masigurado ng dalawang suspek na napatay na ang dalawang pakay ay mabilis na tumakas ang mga ito.