MANILA, Philippines — Umaabot umano sa P50-milyon ang hinihingi ng ransom ng mga tiwaling pulis sa nahuhuli nilang Chinese drug lord.
Ito ang ibinunyag kahapon ni dating Criminal Investigation and Detection Group (CIDG) chief at ngayon ay Baguio City Mayor Benjamin Magalong sa pagharap nito kahapon sa pagdinig ng Senate committee on justice and human rights tungkol sa nangyayaring katiwalian sa loob ng National Bilibid Prison.
Ayon pa kay Magalong, nagsagawa siya ng intelligence operations at case build-up tungkol sa napapaulat na iligal na gawain ng CIDG, National Capital Region Police Office (NCRPO) at Police Office Regional Office 3 at natuklasan niya na may mga “rogue elements” ang PNP na may mga “enterprise criminal minds”.
Kalimitan aniya ay pinapaikot ng mga tiwaling pulis ang pinuno ng kanilang opisina sa mga buy-bust o illegal drug operations.
Kalimitan aniya ay nagsasagawa ng operasyon ang mga tiwaling miyembro ng PNP na hindi nalalaman ng kanilang pinuno at kapag nakuha na nila ang target na high profile Chinese personality at ang ilegal na droga ay ididiretso ito sa kanilang safe house kung saan itatago ang kabahagi nila ng nakumpiskang droga.
“Kung 100 kilos na droga ang nakumpiska, 30 kilos lamang ang idideklara at ang natira ay muling ibebenta sa merkado”, wika ni Magalong.
Idinagdag pa ni Magalong na bukod dito, ang nahuling Chinese drug lord ay ipapatubos sa halagang P50 milyon saka muling manghuhuli ng ibang Chinese drug personality upang ipalit sa kanya.
Kaya bukod sa kumita na sa droga ang mga tiwaling miyembro ng PNP ay kumita pa sila sa nahuling Chinese drug lord.