Call center agent tigok sa sagasa ng SUV
MANILA, Philippines — Hindi na umabot pang buhay sa pagamutan ang isang binatang call center agent matapos masagasaan ng isang humahagibis na SUV habang tumatawid sa highway sa Brgy. Chrysanthemum, San Pedro City, Laguna kamakalawa.
Ang 33-anyos na biktima ay kinilalang si Gian Paolo Benito, residente ng #10 F. Santiago St., ng naturang lugar.
Agad namang naaresto ng mga otoridad ang driver ng Toyota Innova (conduction sticker A3 X874) na tinakasan ang kanyang pananagutan sa biktima na si Mell Anthonie Hermidilla, 18 taong gulang, estudyante ng Brgy. San Antonio, ng nasabi ring lalawigan.
Sa ulat ng pulisya, dakong alas-4:30 ng madaling araw, habang papatawid ang biktima sa national highway sa naturang lugar nang biglang dumating ang rumaragasang SUV na minamaneho ni Hermidilla at nasagasaan ang biktima.
Gayunman sa halip na tulungan ay humarurot ang sasakyan ng suspek patungo sa katimugang direksiyon ng nasabing lugar.
Nagawa pang maisugod sa Amante Hospital ang biktima pero idineklara na itong dead-on-arrival sanhi ng matinding sugat na tinamo sa kaniyang ulo.
Naaresto naman ang suspek na ngayon ay nahaharap na sa kasong reckless imprudence resulting to homicide.
- Latest