Parak utas, utol sugatan sa road crash

MANILA, Philippines — Patay ang isang bagitong pulis habang nasa malubhang kalagayan naman ang nakababatang kapatid matapos sumalpok sa isang road sign ang sinasakyan nilang motorsiklo sa Maragondon, Cavite kahapon ng umaga.

Nakilala ang namatay na biktimang si Thom Nueva, 24, Patrolman na nakatalaga sa PNP-SAF NCRPO, binata; habang patuloy na inoobserbahan sa ospital ang kalagayan ng nasugatang kapatid na si John Nueva, 22; pawang taga-Brgy. Sabang, Naic, Cavite.

Nabatid na minamaneho ng pulis ang Kawasaki Ninja na wala pang plate number, dakong alas-2:00 ng madaling-araw nang pagsapit sa Brgy. San Miguel B, ay hindi napansin ang isang road sign sa kalsada kaya sumalpok dito.

Sa lakas ng impact ay tumilapon ang dalawa at kapwa nadala naman agad sa San Lorenzo Hospital, pero dahil sa matinding pinsalang natamo ay hindi na umabot ng buhay si Thom.