MANILA, Philippines — Nadakip ng mga otoridad ang dalawang babaeng pinaghihinalaang notoryus na drug trafficker at nasamsam sa mga ito ang nasa P 25 milyon halaga ng shabu sa isinagawang buy bust operation, kahapon ng madaling araw sa Brgy. Sta Barbara, Baliwag, Bulacan.
Kinilala ang mga nadakip na suspek na sina Cristina Joana Trinidad alyas Joan, 39, residente ng Brgy. Tambubong, San Rafael, Bulacan at Ruth Francisco, 34, ng Brgy. Loma de Gato, Marilao, Bulacan.
Sa ulat, bandang alas-3:50 ng madaling araw nang magsagawa ng buy bust operation ang mga elemento ng Drug Enforcement Unit ng Baliwag Municipal Police Station (MPS) at nasakote ang dalawang suspek matapos na magbenta ng isang transparent plastic sachet ng shabu na naglalaman ng P10,000 halaga ng droga sa isang undercover agent
Bukod dito ay nakumpiska rin sa mga ito nang inspeksyunin ang dalawa pang katamtamang laki ng plastic sachet ng shabu, isang Nike bag na naglalaman ng tatlong piraso ng plastic sachet ng shabu , isang timbangan at tatlong mobile phones na umaabot sa 3.7 kilogram na may street value na P25 milyon.