MANILA, Philippines — “We have not, and we will never surrender any part of our territory”!
Ito ang sinabi ni Defense Secretary Delfin Lorenzana sa mga mediamen kung isinurender na ng pamahalaan ang Kagitingan Reef matapos na pasalamatan ang China sa pagtatayo dito ng rescue center.
Ginawa ng Kalihim ang pahayag sa gitna na rin ng mga espekulasyon na isinuko na ng administrasyon ang Kagitingan Reef sa China matapos itong pasalamatan sa pagtatayo ng rescue center.
Binigyang diin ni Lorenzana na muling nanawagan ang pamahalaan sa China at iba pang bansang kaagaw nito sa teritoryo sa West Philippine Sea ( South China Sea ) na isapinal na ang katanggap –tanggap na Code of Conduct sa usapin ng pinag-aagawang teritoryo.
Ang Spratly Islands sa West Philippine Sea ay pinag-aagawan ng Pilipinas, Brunei, Taiwan, Malaysia kung saan ang pinakaagresibo ay ang China.
Sinabi ni Lorenzana na nanatili ang presensya ng AFP troops sa hurisdiksyon ng bansa sa Exclusive Economic Zone (EEZ) na kahit limitado ang resources ay mahigpit na binabantayan maging ang pinakamalayo mang teritoryo ng bansa.
Kaugnay nito, muli namang iginiit ni Lorenzana ang pangangailangan upang irebisa ang Mutual Defense Treaty (MDT).