MANILA, Philippines — Hinagisan ng granada ng riding in tandem suspects ang bahay ng isang judge na tutol umano sa Bangsamoro Organic Law (BOL) naganap kamakalawa ng gabi sa Cotabato City.
Sa ulat ni Police Regional Office– Autonomous Region in Muslim Mindanao (PRO-ARMM) Director P/Chief Supt. Graciano Mijares, dakong alas-9:10 ng gabi nang hagisan ng granada ng dalawang lalaki na magkaangkas sa motorsiklo ang compound ng tahanan ni Angelito Rasalan, 53 , Municipal Circuit Trial Court (MCTC) Judge sa Nuro Upi, Maguindanao sa kahabaan ng Sta Maria Street, Mother Barangay Rosary Heights (MBRH), Cotabato City.
Si Rasalan ay kapatid ni Aniceto Rasalan, Executive Secretary ni Cotabato City Mayor Cynthia Guiani-Sayadi na isa ring anti-BOL advocate sa kanilang lugar.
Nabatid na naghahanda na para matulog ang pamilya ni Judge Rasalan nang bigla silang makarinig ng dalawang malalakas na pagsabog sa loob ng kanilang compound na ang isang granada ay tumama sa bubungan ng bahay habang ang isa pang granada ay tumama sa isa pang bahay sa kanilang compound.
Ayon naman kay PNP Chief P/Director General Oscar Albayalde, terorismo at personal na alitan ang kanilang masusing iniimbestigahan sa insidente.