MANILA, Philippines — Nasawi ang tatlong katao kabilang ang isang limang taong gulang na batang lalaki makaraang makulong sa nasusunog na commercial/residential area kahapon sa Quezon City.
Ang mga nasawi ay kinilalang sina Arcenia Amongo, 80; Jose Ilalim, 42 at ang 5-anyos na batang si John Daniel Arciaga na pawang magkakamag-anak.
Sa ulat ng Quezon City Fire Marshal, bandang alas- 3:00 ng madaling araw nang tupukin ng apoy ang tatlong kabahayan mula sa isang tindahan at katabi nitong mga establisyemento sa kahabaan ng Damong Maliit Road, Brgy. Nagkaisang Nayon, Novaliches.
Sa imbestigasyon ay bigla na lamang tinupok ng apoy ang isang tindahan na mabilis na kumalat sa katabi nitong 7 establisyemento at tatlong kalapit na bahay sa nasabing lugar.
Kinailangan naman ang 13 fire truck para maapula ang sunog na tumupok sa nasabing mga kabahayan, establisyemento at isang tindahan.
Kasalukuyan pang inaalam ng mga otoridad ang pinagmulan ng sunog.