Surprise drug test sa mga kandidato
MANILA, Philippines — Kung ang pamunuan ng Philippine Drug Enforcement Agency (PDEA) ang masusunod ay nais nilang magsagawa ng sorpresang drug test sa mga kandidato.
Sinabi ni PDEA Director General Aaron Aquino, pabor siyang isailalim ang mga pulitikong tumatakbo sa eleksiyon sa drug test upang ipakita sa publiko na hindi sila gumagamit ng bawal na gamot.
Gayunman, balewala lamang aniya ang naturang proseso dahil alam naman ng mga pulitiko na isasailalim sila sa drug test dahil pansamantalang titigil umano ang mga ito sa paggamit ng illegal na droga upang maging negatibo ang resulta ng kanilang drug test.
Ang mas mainam ay isailalim ang mga kandidato sa isang surprise drug test upang hindi nila ito mapaghandaan at talagang mahuli sa akto ang mga lulong sa illegal na gamot.
Anya, maaari itong isagawa kahalintulad nang pagsasagawa nila ng surprise drug test sa kanilang mga kapwa opisyal kung saan magpapatawag ng isang pulong, ngunit pagdating nila sa loob ng conference room ay isasarado na ang silid para lahat ay walang ligtas at kinakailangang magsumite ng kanilang ihi upang isailalim sa pagsusuri.
- Latest