MANILA, Philippines — Tatlong katao ang inaresto matapos ang ginawang pambabastos habang tumutugtog ang Lupang Hinirang sa flag raising sa San Jose, Batangas kamakalawa.
Ang mga inaresto ay kinilalang sina Jella Espeleta, 22 ng Batangas City; Marissa Rendon, 36; at Reymar Andal, 25 ; pawang taga San Jose, Batangas.
Batay sa ulat, pasado alas-7:00 ng umaga nang nang maaresto ang tatlo sa paglabag sa RA8491 o ang Heraldic Code of the Philippines sa Brgy. Taysan, San Jose ng lalawigan.
Sina Jella Rose at Marissa ay inaresto dahil sa paglalakad habang tumutugtog ang pambansang awit na Lupang Hinirang; habang si Reymart ay hinuli naman dahil sa hindi ito tumayo.
Magugunitang noong unang bahagi ng Setyembre ng taong ito, 34 na manonood sa isang sinehan sa Brgy Malinis, Lemery, Batangas ang inaresto dahil sa hindi pagtayo habang tinutugtog ang pambansang awit sa loob ng isang sinehan.