MANILA, Philippines — Nakatakdang itaas sa P2 milyon ang pabuya para sa ikadarakip sa apat na militanteng lider na nahaharap sa kasong double murder.
Ang pahayag ay ginawa ni Atty. Ferdinand Topacio kahapon bilang reaksyon sa pasaring ni Bagong Alyansang Makabayan (Bayan) Secretary General Renato Reyes na ang iniaalok na P1 milyong pabuya ay isang PR gimmick at lame publicity stunt lamang.
Ayon kay Topacio, kung ang tingin ni Reyes sa pabuya ay ‘cheap’ lamang, ay maaari naman nila itong gawing P2 milyon.
“Kung para sa kanya ay cheap yung P1 million, gawin siguro nating P2 million, titingnan natin kung may magdo-donate,” anang abogado, sa panayam sa radyo.
Magugunita na noong Sabado sa isang forum ay inianunsyo ni Topacio ang P1 milyong reward para sa pag-aresto kina dating Bayan Muna Representatives Satur Ocampo at Teddy Casiño, Anakpawis partylist Rep., Rafael Mariano, at Liza Maza ng Gabriela.