MANILA, Philippines — Patay ang limang miyembro ng mga bandidong Abu Sayyaf Group (ASG) at isang sundalo matapos na magsagupa sa lalawigan ng Sulu, kamakalawa ng gabi.
Sa unang bugso ng bakbakan dakong alas-12 ng hatinggabi sa hangganan ng Brgy. Tanum at Liang, Patikul, Sulu ay apat ang napatay sa mga bandido at isa sa sundalo habang lima naman ang nasugatan sa panig ng kalaban.
Kinabukasan dakong alas-9:30 ng umaga sa hot pursuit operations ng mga elemento ng 1st Scout Ranger Battalion ay muling nakasagupa ng mga sundalo ang humigit kumulang sa 20 Abu Sayyaf sa pamumuno ni Almadjan Sajhidjuan alyas Apoh Mike sa Brgy Tabu-Bato, Maiumbung, Sulu na ikinasawi ng isa pa sa mga bandido.