MANILA, Philippines — Apat katao ang nasawi habang tatlo ang malubhang nasugatan matapos na sumalpok ang sinasakyan nilang SUV sa punong kahoy sa tabi ng kalsada sa Barangay Calayan, Gonzaga, Cagayan, kamakalawa.
Ang mga nasawi ay kinilalang sina Nikolo Aquino 24, Nicole Keziah Nuega, Jing Baquiran at anak nitong dalagita na si Victoria Louis Baquiran na mga residente sa lungsod.
Nasa kritikal na kondisyon sina Almond Baquiran, Joshua De Guzman at Shela Mapala.
Sa imbestigasyon, bago nangyari ang aksidente dakong alas-3:00 ng hapon ay pauwi na galing sa isang outing sa Sta. Ana ang mga biktima nang maantok si Aquino sa pagmamaneho ng Isuzu MU-X at sinalpok ang isang puno sa tabi ng kalsada.
Sa lakas nang salpok ay tumaob at nayupi na parang lata ng sardinas ang sasakyan kung kayat nahirapang hugutin ang mga biktima nang mga rescuer.