P5-M shabu nasamsam sa condo ng Chinese drug trafficker
MANILA, Philippines — Tinatayang aabot sa 1 kilong shabu na nagkakahalaga ng P5 milyon ang nasamsam ng elemento ng PNP-Drug Enforcement Group, Philippine Drug Enforcement Agency (PDEA) at Muntinlupa City Police nang salakayin ang condominium unit ng isang Chinese drug trafficker sa Muntinlupa City, kahapon ng umaga.
Batay sa ulat, bandang alas-5:40 ng umaga nang salakayin ng mga otoridad ang condominium unit na pag-aari ng drug suspect na si Li Hong Peng sa Room 323 Rhapsody Condominium, Buli, Muntinlupa City, subalit nabigong masakote ito.
Ayon kay PNP-DEG Director P/Chief Supt. Albert Ignatius Ferro na si Peng ay minsan nang nasakote sa pag-iingat ng 20 kilo ng shabu pero nakalaya matapos umanong magpiyansa sa korte.
Ang ipinagtataka ng pulisya na nakasaad sa Comprehensive Dangerous Drugs Act 2002 ang pagtataglay ng 10 gramo ng shabu ay isang non-bailable offense, pero sa kabila ng nasakote na si Peng sa 20 kilo ng shabu ay pinalaya ito ng korte matapos na maglagak ng malaking halaga ng piyansa.
Nabatid na si Peng, isa sa mga lider ng drug syndicate ay nasakote na noong Enero 2012 sa San Juan City matapos na ito at ang kaniyang misis na si Aina Laquire ay mahulihan ng droga sa raid.
Nitong nakaraang taon ay muling nasakote si Peng sa raid sa Parañaque City pero muli namang nakapagpiyansa at nakalaya.
“The President is already looking into this. In a few days time,we will be informed. Actually, we are trying to conduct further investigation to account the judge who allowed bail for such a non-bailable offense,”disyamadong pag-amin pa ni Ferro.
- Latest
