Suplay ng kuryente sa summer, sapat – DOE

MANILA, Philippines — Tiniyak kahapon ng Department of Energy (DOE) na sapat ang suplay ng kuryente sa bansa nga­yong papalapit na panahon ng tag-init o “summer”’.

“We have a supply na sakto lang for summer. Sa projection natin ngayon, we don’t expect brownout,” ani Secretary Alfonso Cusi.

Patuloy naman na nagmo-monitor ang DOE sa halaga ng enerhiya upang matiyak na hindi magkakaroon ng pagtataas sa presyo nito. Dagdag pa rin dito ang pagbubukas ng mga bagong planta ng enerhiya na makakadagdag sa suplay sa merkado. 

Kabilang dito ang Limay cogeneration power plant sa Bataan na may 150 megawatts (MW) at 400 MW Pagbilao 3 coal power plant sa Quezon Province.

Sa Visayas, magbubukas din ang 300mw Aboitiz Group coal plant sa Toledo at ang kauna-unahang solar-diesel hybrid power plant sa Limasawa, Southern Leyte ng National Power Corporation na pinasinayaan kamakailan.

Sa pagtaya ng DOE, ina­asahan na nasa 10,500mw ang pinakamataas na demand sa enerhiya sa Luzon na mangyayari sa ikalawa o ikatlong linggo ng Mayo.