MANILA, Philippines — Hindi na umabot ng buhay sa ospital ang isang 62-anyos na lolo matapos itong atakihin umano sa puso habang nagpapa-blotter sa Manila Police District-Station 5 laban sa isang 25-anyos na tricycle driver na kanyang nakaaway kamakalawa sa Paco, Maynila.
Batay sa ulat, sinamahan ang biktima ng kanyang anak sa nasabing police station para ireklamo ang nakaaway nitong si Normar Salisi, alyas Butchoy, tricycle driver at residente ng 6047 Santiago St., Paco.
Habang kinukunan ng reklamo ay bigla na lang itong nag-collapse kaya itinakbo sila ng mga pulis sa Philippine General Hospital (PGH), subalit idineklarang dead-on- arrival.